Exo 17 | TVK | STEP | E kakaoen nae, mol-Isrel xil langgusil xat sepinien na Iahova. Lamea reling uruvuol tahal Saen e labe rute sav, di, labe rute sav mun. Dit lapol ni mak ba vuma ... laduxoh ut Revidim. E rute ak, oei te munen tovuol,

Exodus 17

1 E kakaoen nae, mol-Isrel xil langgusil xat sepinien na Iahova. Lamea reling uruvuol tahal Saen e labe rute sav, di, labe rute sav mun. Dit lapol ni mak ba vuma ... laduxoh ut Revidim. E rute ak, oei te munen tovuol, 2 ma laseputut ni Mosis e laba labiteni mini labit, “!Sa ti oei mi xamem mamu ni li!”

E Mosis bit rilomun ni mi xil bit, “?Veneh ma di museputut ni nou mak? ?Veneh ma mubit musak pis Iahova tengan ti vapisen xeihen nan mi xamim vehakut?”

3 E moletin xil, meruru nggat xil holu e dit laseputut ba ni labit, “?Veneh ma oteleh rerat xamem ra hal Isip? Tutut horamue namem xil e vongoro samem xil mun, vulonge xil bue li tova tang. ?!Obit opol ni meruruen vaat vin xamem!?”

4 Misak ni, Mosis misis nggeih ba mi Iahova bit, “?Nipol ni naha mi moletin xil ak? !Navehi, lavov vin nou xiak!”

5 Ma Iahova bit rilomun ni mini bit, “Uleh ti eilep xil na mol-Isrel xil e utel xil muha. Uhur xat eitingil nam xa otehas Oeisal Nael ni itel xatuk. 6 E melele xa mutuxoh Vathu Senae, upus nou nisoh sangas visal hat tei xa mahulong. Uhas hat ak ni eitingil nam e oei istal ixo en, ma moletin xil likila limu ni.” Ma Mosis pol ni mak e pe met eilep xil na mol-Isrel xil. 7 Ma rute ak, laling hisen be 'Meribah' xa koute teni be 'sepututen' vengan xa lateseputut ni Mosis. E laling hisen tei mun be 'Massah' xa koute teni be 'sakpisien' vengan xa latesak pis Iahova e rin xa latehit, “?Iahova dat visal xir mu tarati ak?”

Hi Misak ni Mol-Isrel Xil Labas Tan ni Mol-Amalek Xil

Eksodas 17:8-13

8 Melele xa mol-Isrel xil ladi e ut Revidim, mol-Amalek xil lamei tengan lapol ni vaeen vatel xil. 9 Mosis biteni mi Sosua bit, “Uhosei ti moletin xil e muvue xat xamim tengan ha muvae itel mol-Amalek xil ak. Ti, visuvong makoe, inou nihur eitingil navan xa Hi tehiteni tehit nihuri, e ha nisoh nite nesao e vathu ak.” 10 Ma Sosua pol ni nggoni ngan xa Mosis biteni mini. E makoe, Mosis mileh Eron xal Hur be xatel latbe nesao e vathu ak. E Sosua del moletin nan xil ba labae del mol-Amalek xil. 11 E vathu nesao, melele xa Mosis mite hen xalu be nesao, mol-Isrel xil di labas tan ni mol-Amalek xil. E melele xa hen xalu be tan, mol-Amalek xil sung di labas tan ni xil. 12 Ma melele xa he Mosis xalu memel, Eron xal Hur lupo hat tei tengan Mosis vatotan en. E xalu lusoh ludi rin xalu e ludal xat hen xalu dit nesao ba duxoh melele xa meteneai be tan. 13 Nggo sexien ak, Sosua e moletin nan xil labas vuol ni mol-Amalek xil.